घरमा पनि झन घरकै याद

 घरमा पनि झन घरकै याद आउँछ
निद्रामा पनि पटक पटक जगाउँछ
झन्झनाउँछ कान आवाज बिना नै
टुटेको मनको तारले अझै सघाउँछ

कहाँ पो खोजी, कति टाढा गन्तब्य
आफ्नै मन आफ्नै खोलाले बगाउँछ
सकिन्न होला पुग्न, मनलाई पुर्याउन
जिन्दगी पोखिँदा पनि भर्न लगाउँछ

सुकेको हाँगामा मुना पलाउला र ?
डढेलो लागेको मन अझै जलाउँछ
मनै हो फेरि कता कहिले जोडिएला
चुडिन्छ कि मन यताउता डग्मगाउँछ

एकै दिन एकै छिन, बाँच्न पाइन्न कि
कोइलीले दिनहुँ हाम्रै गित सुनाउँछ
घर र घरमै पनि कति धेरै फरक छ
घरमा पनि  झन घरकै याद आउँछ 

2nd Baisakh 2082

Pokhara